تحذير من جروبات الفيس بوك الحريمي

متجربيش كل اللي تسمعيه او تقراي عنه في جروبات الفيس بوك

جروبات الفيس بوك الحريمي تحذير من جروبات الفيس بوك الحريمي
جروبات الفيس بوك الحريمي

تحذير من جروبات الفيس بوك الحريمي .. حد يدينى بالجزمه على دماغى علشان معنتش اسمع كلام ونصايح الفيس



عملت بنصايحكوا ..وقولت فرصه ما دام جوزك خرج يصلى قومى البسى وظبطى نفسك وحطى عود بخور وغيرى من نفسك وقبل ما يجى من بره اعملى نفسك مغمى عليكى بس وانتى متشيكه وبقميص نوم شيك علشان تلفتى انتباهه ما هو قالبنى ومش بيدينى اهتمام ….

وقد كان وعملت بنصايحكوا واتزوقت وفهمت العيال هنضحك على بابا ونفهمه ان ماما اغمى عليها يابابا وتعبانه وتعيطوا …اتفقنا ياعيال ..(حاضر ياماما بس تدينى مصروف كبير ) حاضر ياجزم ..استغلالين زى اللى مخلفكوا …(ممعيش غير ٣.جنيه انت ياواد ٢ جنيه والبنت جنيه واحد وده لان ابنى كبير وبنتى نونو لسه ٤.٥ متعرفش حاجه) وقد كان ..

واخدوا الفلوس واتفقنا انى همثل انى مغمى عليه وهما لما يشوفوا باباهم يعيطوا ( كنت رسمه فى خيالى انه هيتخض ويجرى يشتالنى ويدينى قبله الحياه ) …



هو فعلا ادانى .بس للاسف حاجه تانيه …..

مطولش عليكوا قولى طولى .نمت وفردت شعرى على سجاده الصاله ولابسه حاجات مثيره ومكياج علشان .يتحرك ومشاعره تفز من مكانها….المفاجاه ..جوزى سمعه صوت جزمته طالع ..قولت للعيال اجهزوا علشان ابوكوا طالع (والله لو الخطه نجحت هوديكوا الحديقه)

اسكتوا بقى خلاص قرب من الشقه وانا رحت نمت …..جوزى

فتح ودخل. ومزيكه حسب الله اشتغلت يابابا ..الحقنا ماما ماتت انت زعلتها …ساب العيال وجرى عليه رفع راسى من على السجاده ..ويهز فيه .مالك ياحبيبتى (ايوه كده انطق يابجم قربت انسى الكلام الحلو ) .

وشويه ورمى دماغى على السجاده وجرى عليه لى المطبخ جاب كوبايه ميه وشرب حبه وملء بقه وغرق وش اللى خلفونى.. .فوقى فوقى..وانا حسه نفسى المكياج اتبهدل وساح ..( خلاص يابن الورمه غير بقى هو كله بخ ميه مفيش قبله للحياه الله يحرقك) وده مره واحده وانا مغمضه وعايشه اللحظه ومستنيه القبله ……فجاه ….الاقى كف ..خماسى الابعاد .تررررراخ..والخد التانى ….تررررررراخ….

( قولت كده كتير حرام لازم اعمل نفسى فوقت وشى بيطلع ناااار ) وفتحت عنيه انا فين وانت مين ومين العيال دى …اذ والاقى عيالى بصوت واحد ..احنا نجحنا فى الخطه اهه هتودينا الحديقه امتى …وبنتى تعيط قدام ابوها وتقولى .اشمعنا اخويه ٢ جنيه وانا جنيه واحد ….يالهووووووووى اغمز بعينى علشان يفهموا ويسكت قالي تصدقي تستاهلي القلمين اللي خدتيه